Kesi nzito yafunguliwa tena dhidi ya Michael Jackson, mlalamikaji atoa ushahidi wa kulawitiwa utotoni

Wakati Michael Jackson akiwa amelala kwenye nyumba yake ya milele, bado familia yake imeendelea kuandamwa na tuhuma nzito zinazomhusu mfalme huyo wa Pop duniani. 

Mlalamikaji, James Safechuck mwenye umri wa miaka 36 hivi sasa ambaye alikuwa katika kesi ya Michael Jackson ya mwaka 2005 kuhusu ulawiti, ameibuka tena na kufungua kesi na kutoa ushahidi mpya wa jinsi alivyokuwa akilawitiwa na marehemu mwaka 1988 wakati akiwa mtoto mwenye umri wa miaka 10 tu.

James ambaye sasa ni baba wa familia hakuonesha ushirikiano wakati wa kesi ya mwaka 2005 licha ya kutajwa kama sehemu ya ushahidi. 

TMZ wameeleza kuwa wamepata nyaraka zilizowasilishwa na Safechuck mahakamani ambazo zinaeleza kuwa Michael Jackson alimfundisha lugha ya ishara wakati akiwa na umri wa miaka kumi, lugha ambayo alikuwa akiitumia kutaka kumueleza kuwa anataka kufanya nae mapenzi. 

Ameeleza kuwa moja kati ya ishara hizo ni pale walipokuwa wakishikana mikono kusalimiana, alikuwa anambinya au kumtekenya katikati ya kiganja. 

Katika nyaraka hizo ameendelea kueleza kuwa MJ alikuwa anamchukua na kumpeleka kwenye majumba ikiwa ni pamoja na sehemu inayoitwa ‘The Hideout’ ambapo walikuwa wakinywa vinywaji laini, pink wine na kuangalia video za ngono. 
Amesema marehemu aliendelea kumfanyia vitendo hivyo  hadi pale alipoanza kubalehe. 

Hata hivyo, mwanasheria wa Michael Jackson, Howard Weitzman ameiambia TMZ kuwa kesi hiyo inatakiwa kutupiliwa mbali kwa kuwa imeletwa kwa mara ya kwanza miaka 20 baada ya tukio hilo analolieza na kwamba James Safechuck aliwahi kula kiapo na kueleza kuwa Michael Jackson hakumfanyia kitu chochote kibaya.

Audio: Linex atangaza nia ya kugombea ubunge 2020 kupitia chama kipya

Baadhi ya Mastar wa Tanzania wameamua kuweka wazi nia zao za kugombea nafasi za uongozi katika ngazi mbalimbali,miongoni mwa watu hao kwa sasa ni msanii kutoka Kigoma All Stars anaitwa Linex Mjeda.

Amekua wazi kutaja chama ambacho anategemea kugombania nafasi yake ya ubunge aliyosema kuwa tayari ana jimbo anasubiri muda tu na chama alichosema anategemea kugombea ni chama kipya cha ACT.

Soudy Brown amemuuliza maswali mengi ikiwemo kama kweli ana kadi ya chama,sikiliza alichojibu hapa.

Bonyeza play kusikiliza.

Picha za wanamitindo kwenye basi zikionyesha mwanamke akionekana kama anayebakwa na wanaume, zazua utata

Picha za wanamitindo zilizopigwa kwenye basi zikionyesha mwanamke akionekana kama anayebakwa na wanaume, zimezua hisia kali kwenye mitandao ya kijamii nchini India
Watu wengi wamesema kuwa picha hizo zinaonekena kusifu kitendo cha ubakaji kilichomkuta mwanafunzi mmoja mjini Delhi kwenye basi mwaka 2012.

Mwanafunzi huyo ambaye aliga baadaye, alibakwa na genge la wanaume. 
Picha za mpiga picha Raj Shetye ambaye alipiga picha hizo, zinaonyesha mwanamke akioenekana kupigania maisha yake akiwa amezuiliwa na wanaume wawili kwenye kiti cha basi. 
Ni kitendo ambacho kinaleta hisia kali kwa watu wengi na kumbukumbu za unyama uliotendewa msichana wa shule kwenye basi hadi akafa.

Watu wengi kwenye mitandao ya kijamii wanasema picha hizo ni za kukera na zinatisha . 
Bwana Shetye hata hivyo amejitetea akisema picha hizo ni za kuonyesha tu hali inayowakumba wanawawake wengi nchini huo wala sio kuonyesha ubakaji. 
Hata hivyo picha hizo ziliondolewa kwenye mtandao huo wa Behance baada ya hisia kali kutoka kwa watumiaji waTwitter na Facebook. 

Ubakaji wa msichana huyo aliyekuwa na umri wa miaka 23 ulisababisha maandamano makubwa nchini humo na hata kulazimisha maafisa wakuu kuweka mikakati mipya ya kukabiliana na ubakaji  BBC ilijaribu kumtafuta Bwana Shetye aweze kujieleza kuhusu picha hizo ingawa hatukufanikiwa badli vyombo vya habari vilimnukuu akisema hakua na nia ya kuleta kumbukumbu mbaya kuhusu kitendo cha ubakaji kilichozua hasira kote nchini India.

UKATILI: Inspekta wa Polisi mbaroni kwa tuhuma za kuua mwanaye

Jeshi la Polisi linamshikilia Inspekta wake, Celestine Makene (40) kwa madai ya kumpiga hadi kumsababishia kifo mtoto wa kaka yake, Alerd Makene (16). 

Makene anadaiwa kutenda kosa hilo Julai 24, mwaka huu katika makazi ya polisi, Mtoni Kijichi, Dar es Salaam na anashikiliwa katika Kituo cha Chang’ombe. 

Kamanda wa Polisi Mkoa wa Temeke, Kihenya wa Kihenya alithibitisha kutokea kwa tukio hilo na kusema marehemu Alerd alikuwa mwanafunzi wa kidato cha kwanza katika Shule ya Sekondari Mbagala Kuu. 

Hata hivyo, alisema uchunguzi wa kifo chake unaendelea na hatua za kisheria zitachukuliwa dhidi ya mtuhumiwa endapo itathibitika kuwa alitenda kosa hilo.

Tunamshikilia mtuhumiwa wa mauaji hayo ambaye pia ni askari polisi katika Chuo cha Polisi Kurasini, tutahakikisha kuwa haki inatendeka bila kujali nafasi aliyonayo mtuhumiwa,” alisema kamanda huyo.  

Imedaiwa kuwa Makene alimwadhibu baada ya kupokea malalamiko kutoka kwa mzazi wa jirani akimlalamikia kwamba Alerd alimpiga mwanaye hivyo kumtaka amkanye juu ya tabia hiyo. 

Akizungumzia tukio hilo, jirani ambaye hakutaka jina lake kutajwa gazetini, alisema watoto hao walikuwa wakicheza mpira lakini kwa bahati mbaya Alerd alimpiga rafiki yake huyo usoni kwa mpira na baada ya kupigwa kwa mpira, alikwenda kwao kumshtaki. 

Usiku huo baba yake alimfungia chumbani na kumpiga kwa fimbo, ngumi na mateke kiasi kilichomfanya mtoto huyo kupiga kelele sana,” alisema na kuongeza kwamba majirani walijaribu kwenda kumwamulia lakini hakusikiliza.

Alisema siku iliyofuata mtuhumiwa alisafiri kikazi Nairobi lakini akadai kuwa kabla ya kuondoka, aliamuru mtoto huyo asifunguliwe mlango. 

Alidai kuwa baada ya mtoto huyo kulalamika sana, mama yake mdogo alimfungulia mlango na kumkuta akiwa amevimba uso na akivuja damu nyingi.  Alisema waliamua kumpeleka Hospitali ya Temeke kwa matibabu na alifariki dunia usiku wa Ijumaa Agosti Mosi. 

Baba yake alirudi haraka kutoka Nairobi alipopigiwa simu kuwa Alerd ana hali mbaya na alifahamishwa baada ya muda mfupi kuwa amefariki,” alisema.

kukuta tayari Alerd ameshafariki na polisi walimkamata baada ya kupata taarifa kuwa amefika hospitalini hapo. 

Alipoulizwa kuhusu matokeo ya uchunguzi wa kifo cha mtoto huyo, Mganga Mkuu wa Hospitali ya Temeke, Dk Amani Malima alisema polisi ndiyo wenye mamlaka ya kutoa ripoti hiyo kwa vyombo vya habari na kuwa wao walimaliza kazi yao na kuwakabidhi. 

Hata hivyo, Kihenya alisema polisi wanayatumia matokeo ya uchunguzi wa daktari katika kukamilisha uchunguzi wao na baada ya kukamilika atatoa taarifa kamili kuhusu kifo hicho. 

Hadi jana, utaratibu wa kusafirisha mwili wa marehemu kwenda Musoma kwa maziko ulikuwa ukifanyika.

Credit Mwananchi.

Kuhusiana na madawa ya kulevya, Agnes Gerald ‘Masogange’ ahojiwa zaidi ya masaa 10 kwenye uwanja wa ndege

Kikosi Kazi cha Polisi cha Kuzuia Dawa za Kulevya nchini kimemhoji kwa zaidi ya saa 10, msanii Agnes Gerald ‘Masogange’ kuhusiana na tuhuma za kukamatwa na dawa aina ya crystal methamphetamine huko Afrika Kusini, Julai mwaka jana.

Kamanda wa Polisi Kitengo cha Kuzuia na Kupambana na Dawa za Kulevya, Gedfrey Nzowa alisema jana kuwa Masogange alianza kuhojiwa juzi usiku baada ya kuwasili kwenye Uwanja wa Ndege wa Kimataifa wa Julius Nyerere (JNIA), Dar es Salaam akitokea Afrika Kusini. 

Nzowa alisema baada ya kuhojiwa, Masogange aliruhusiwa na kwamba yupo huru, ameachiwa bila masharti yoyote. 
Kamanda wa Polisi wa Uwanja wa Ndege, Hamisi Selemani naye alithibitisha kuhojiwa kwa msanii huyo akisema: “Hapa kuna kikosi kazi, kila mmoja alimhoji kwa wakati wake lakini kwa upande wa polisi tulimpekua na kumhoji lakini tumemwachia.”

Kamanda Selemani alisema Masogange alianza kuhojiwa juzi saa mbili usiku hadi jana saa nne asubuhi. 
Hata hivyo, alipotakiwa kuzungumzia suala hilo, Masogange alikana akisema kwa kifupi na kukata simu: “Hilo unalosema siyo kweli na sipo tayari kuzungumzia hilo… Siwezi kuzungumza na chombo cha habari kwa sasa, shida yako nini?” 

Masogange alitawala vyombo mbalimbali vya habari nchini katikati ya mwaka jana baada ya kukamatwa Afrika Kusini akiwa na nduguye Melisa Edward wakiwa na ‘mzigo’ wa dawa hizo zenye thamani zaidi ya Sh6.8 bilioni. 
Wasichana hao walinaswa baada ya kuwasili kwenye Uwanja wa Ndege wa Kimataifa wa Oliver Tambo, Afrika Kusini wakitokea Tanzania.

Nzowa alisema jana kuwa katika mahojiano hayo walimuuliza kuhusiana na ushahidi alioutoa huko Afrika Kusini kuwa dawa hizo za kulevya alipewa na mtu kutoka JNIA. “Ni kweli tulikuwa tunamuhoji Masogange ili atueleze mtu gani aliyempa crystal methamphetamine kama alivyodai kuwa amepewa na mtu wa hapa JNIA,” alisema Nzowa. 

Katika mahojiano hayo, Nzowa alidai kuwa Masogange alidai kuwa alipewa dawa hizo na mtu ambaye hamfahamu kwa jina lakini anaikumbuka sura yake. Alisema baadaye walikwenda eneo ambalo walipeana dawa hizo na mtu asiyemjua jina lake kwa ajili ya kuweza kumtambua kama alikuwapo eneo hilo. 

Chanzo: Mwananchi

Bibi ajitengenezea jeneza baada ya kuchoshwa na dhiki

“Kila siku naomba Mwenyezi Mungu anichukue haraka ili nikapumzike kutokana na mateso ninayoyapata, lakini hofu yangu nikifa je, nitazikwa kama binadamu wengine? Ndiyo maana nimeamua kujitayarishia jeneza langu,” anasema Scholastica Mhagama (76) mwenye ulemavu wa viungo anayeishi pekee yake katika kibanda kilichoezekwa kwa nyasi. 

Bibi huyo mkazi wa Kijiji cha Lundusi Kata ya Peramiho wilayani Songea Mkoa wa Ruvuma, anasema kwa miaka mingi ameishi katika kibanda hicho alichojengewa na mzungu aliyemtaja kwa jina moja la Kilibada ambaye pia anasema alikuwa akimsaidia kulima mihogo. 

Anaongeza kuwa maisha yake yanategemea kukaa nje ya kibanda chake na kuomba msaada kwa watoto wanaopita ambao huwaomba wamchotee maji. 

Bibi Scholastica akiwa ameegemea jeneza lake.

 

Anabainisha kuwa mara chache anaweza kutokea mtoto ambaye humchotea maji kwenye ndoo ndogo ya lita kumi ambayo huyatumia kwa matumizi ya kuoga, kupikia, kunywa na kwamba hayatoshi kufulia wala kufanya kazi nyingine hali ambayo inamsababishia kuvaa nguo chafu wakati wote.

Anasimulia kuwa huwa anapika mara chache ndani ya kibanda anacholala na hata sehemu anayolala haina kitanda, godoro wala mkeka badala yake amekuwa analala chini katika mfuko wa mbolea na kujifunika blanketi kuu kuu. 

“Ona kwanza mwanangu mahali ninapolala hakuna kitanda wala mkeka, mifuko ambayo ndiyo godoro langu huwa ninaomba tu. Nahitaji msaada, sina uwezo wa kufanya kazi yoyote tangu nilipokatwa mguu wa kulia nilipokuwa darasa la tatu hadi sasa nimekuwa naishi kwa shida ingawa sasa katika uzee hali imekuwa mbaya zaidi,’’ anasema. 

Ajitengenezea jeneza  

Kutokana na kushindwa kupata msaada kutoka kwa ndugu na majirani zake, Scholastica ameamua kutengeneza jeneza lake kabla ya kufa akihofia kuzikwa katika mkeka kwa kuwa ameshindwa kusaidiwa akiwa hai, hivyo anaamini akifa anaweza kutupwa kama mzoga wa mnyama asiye na faida yoyote.

“Nimetengeneza kabisa jeneza langu siku nikifa wanizike humu. Naomba Mungu anichukue haraka ili kuepukana na mateso haya. Nimetengwa na jamii na majirani wanashindwa kunisaidia wanadai eti mimi ni mchawi kwa sababu watoto wangu wote wanne walikufa wakiwa wadogo. Naumia sana kusingiziwa kitu ambacho sikijui,’’ anasema kwa masikitiko. 

Bibi huyo anasema kuwa aliweza kutengeza jeneza hilo baada ya kupewa Sh40,000 na mfadhili mmoja. 

“Tayari nilikuwa na mbao kwangu, hivyo kazi ilikuwa kumlipa kijana fedha na kumpa mbao ili anitengenezee jeneza,” anasema. 
Hata hivyo, aliitaja misaada ya haraka ambayo anahitaji ili aweze kuishi kuwa ni pamoja na baiskeli ya miguu mitatu (wheel chair) ambayo itamwezesha kutembea kwa kuwa hivi sasa amekuwa anatambaa na kupata maumivu makali kutokana na nyama iliyobakia kwenye nyonga baada ya kukatwa mguu.

Pia bibi huyo anahitaji msaada wa bati kwa ajili ya kuezeka kibanda chake kwa kuwa wakati wa masika mvua humnyeshea na kupata mateso makubwa. 

“Mvua yote inaishia mwilini mwangu. Huwa naugua na kupata homa kali lakini Mwenyezi Mungu bado hataki kunichukua. Napata vichomi kutokana na baridi kali hasa usiku hadi inanilazimu kuwasha moto kila siku usiku walau kupata joto. 
“Kwa kweli natamani kufa lakini Mungu bado hajasikia kilio changu anataka niishi,’’ alisema kwa masikitiko. 

Alidai kuwa kuna watu walifika kumuandikisha jina na kumuingiza katika orodha ya watu wanaostahili kupata msaada na kwamba amekuwa anasikia misaada inafika kwa jina lake, lakini hajawahi kupewa hata shilingi.

Hajanywa chai kwa miaka 15  Akisimulia dhiki kuu aliyonayo bibi huyo anasema kwa siku walau anapata milo miwili, lakini chai hajawahi kunywa kwa miaka 15 sasa na kwamba kila siku anakula ugali kwa mboga ya majani aina ya ‘Chinese’ ambayo amekuwa anaomba na kupewa na wasamaria wema wanapopita njiani na kwamba katika kipindi cha miaka kumi sasa hajawahi kula nyama wala samaki. 

Anasema kulingana na matatizo aliyonayo ilitakiwa apelekwe katika kituo cha kulelea wazee wasiojiweza. Hata hivyo, Idara ya Ustawi wa Jamii imeshindwa kumsaidia kwa madai kuwa bibi huyo anaye kaka yake ambaye anamuelezea kuwa ni mzee asiye na uwezo wa kumlea. 

“Mwaka jana mwezi wa 10 nimelima hapa uwanjani matuta 12 kwa kushika jembe huku nimekaa chini na kujivuta, waulizeni majirani watawaambia ninahitaji msaada sina nguo, maji, sabuni, mafuta, pesa za matumizi mimi maisha yangu ni ya kuombaomba tu, alisema. 

Katika enzi za ujana wake wake Scholastica anasema alibarikiwa kupata watoto wanne ambayo wote walifariki wakiwa wadogo.

Hata hivyo kaka yake aitwaye Joackim Mhagama amekiri kuwa mwanzoni alipokuwa ana nguvu alijitahidi kumsaidia, lakini kutokana na umri kwenda ameshindwa kwani naye anahitaji msaada. 

Mwenyekiti wa Kijiji cha Lundusi chenye wakazi zaidi ya 2,500, Kelvin Mahundi amekiri kutambua matatizo aliyonayo Scholastica Mhagama na kwamba walimpeleka ustawi wa jamii ili kuhakikisha anapelekwa katika kituo cha serikali cha kulelea watu wasiojiweza. 

Anasema bibi huyo ilishauriwa apelekwe katika kituo cha Ngei wilayani Nyasa Mkoa wa Ruvuma. Hata hivyo, hafahamu sababu zilizosababisha hadi sasa kutopelekwa katika kituo hicho ili aweze kusaidia hadi mwisho wa maisha yake.

Anasema hadi sasa kijiji hakina fungu la kusaidia watu wasiojiweza ingawa yeye kama mwenyekiti alipeleka taarifa zake kwa watu kama Abasia ya Peramiho ambao awali walikuwa wanatoa msaada pamoja na chama cha wenye ulemavu na kwamba inawezekana umri wake na ulemavu wake vinasababisha kushindwa kupata huduma muhimu. 

Kutokana na hali zao wanawake wazee wenye ulemavu kama ilivyo kwa Scholastica wanaishi katika maisha duni na ushiriki wao katika kazi za jamii ni mdogo kutokana na kukosa fursa na nyenzo za kuwasaidia kuleta maendeleo. 

Sera ya wazee  

Sera ya Taifa ya wazee ya mwaka 2003 inabainisha kuwa suala la uzee na kuzeeka limekuwa lenye umuhimu mkubwa ambapo karne ya ishirini imeshuhudia ongezeko kubwa la idadi ya wazee.

Kulingana na takwimu zilizopo, Tanzania inakadiriwa kuwa ifikapo mwaka 2050 idadi ya wazee wenye umri wa zaidi ya miaka 60 itaongezeka na kufikia milioni 8.3 (asilimia 10 ya watu wote). 

Hata hivyo, mwaka 2050, idadi ya wazee, kwa mara ya kwanza katika historia ya binadamu, inatarajia kuongezeka na kuzidi ile ya watoto na vijana wenye umri chini ya miaka 24. Idadi hiyo katika Bara la Afrika pekee inatarajiwa kuongezeka kutoka milioni 38 ya sasa na kufikia milioni 51. 

Taarifa za Umoja wa Mataifa ya mwaka 1999 inaonyesha kuwa kumekuwa na ongezeko la idadi ya wazee duniani na kwamba ongezeko hilo linaonekana zaidi katika nchi zinazoendelea ambapo viwango vya ongezeko havilingani na uwezo wa rasilimali zilizopo za kuwahudumia wazee. 
Katika nyanja za afya, lishe na huduma nyingine za msingi kwa maisha ya binadamu.

Credit Mwananchi.

Chifu Kiumbe ajibu madai ya kuuza 'unga', asema sasa ameamua kumrudia Mungu

Mfanyabiashara maarufu ambaye amekuwa akitoa misaada mikubwa kwa wanamuziki na watu mbalimbali, Chifu Kiumbe amejibu tetesi zilizokuwa zikielezwa na baadhi ya watu kuwa anajihusisha na biashara ya dawa za kulevya. 

Chifu Kiumbe amekanusha tetesi hizo katika kipindi cha ‘Mkasi’ na kueleza kuwa yeye hajawahi hata kuyaona madawa ya kulevya. 

“Sijawahi kuuza madawa ya kulevya, wala sijawahi kuona unga unafanaje katika maisha yangu. Kwanza katika maisha yangu pombe sijawahi kugusa, sigara sijawahi kugusa wala kinywaji cha aina yoyote.” Amesema Chifu Kiumbe.  

Amesema watu wengi katika jamii wana kasumba ya kumsema mtu kuwa anauza unga kwa sababu tu ana pesa nyingi kitu ambacho sio sahihi. 

Katika hatua nyingine, Chifu Kiumbe ameeleza kuwa hivi sasa ameamua kumrudia Mungu baada ya kufanya mambo mengi na kwamba anataka kujikita katika kujenga misikiti. 

“Nimeamua kurudi kwa mwenyezi Mungu. Nimefanya mengi katika hii dunia na hakuna ambacho sikijui katika hii dunia. Maisha ya kuishi duniani ni machache. Maisha mengi ni kwa mwenyezi Mungu kwa hiyo sasa nimeelekea kwa mwenyezi Mungu na hapa nilipo kiu yangu ni kufikiria jinsi gani ya kujenga misikiti.”  

Akizungumzia kitu ambacho anakijutia katika maisha yake, amesema hana anachojutia zaidi ya kuwa na jina kubwa halafu anajikuta akiandikwa vibaya kwenye mitandao ya kijamii kwa habari zisizo za kweli.  

Credit Times FM

Baada ya kupigwa na binti wa Obama, haya ndiyo majibu aliyo toa msichana huyo nakushangaza watu

Binti wa Raisi wa Marekani, Malia Obama mwenye umri wa miaka 16 alimpiga/alimgonga kwa bahati mbaya msichana aliyefahamika kwa jina la Bridget Truskey walipokuwa katika tamasha kubwa la muziki la Lollapalooza nchini Marekani. 

Msichana huyo amewashangaza watu baada ya kuonesha kufurahishwa sana na tukio hilo  kutokana na umaarufu wa Malia Obama.  Truskey ametweet sentensi kadhaa kuonesha furaha yake huku maelezo yakionesha kuwa haamini kilichotokea. 

“I got (accidentally) kicked by Malia Obama today at Lollapalooza. No lie. Malia. Obama. It was awesome. #lollapalooza.” 

 Ni kweli msichana huyo ana sababu ya kufurahi kwa kuwa amekuwa maarufu pia kupitia tukio hilo.

Video: Jamaa ajiua kwa pisto wakati akijipiga picha yakuweka Instagram akiwa kaishika

Oscar Otero Aguilar, 21, of Mexico City, died after accidentally shooting himself in the head
Alcohol, a camera phone and a loaded gun proved to be a fatal combination for 21-year old Oscar Otero Aguilar.

The Mexico City man had been drinking last week when he borrowed the gun. He reportedly waved it around while trying to take a photo of himself with it. The gun discharged and Aguilar suffered a fatal wound to the head.

"I heard a gunshot, and then I heard somebody screaming and realized somebody had been hurt. I called the police and when they arrived they found that he was still alive," told Bakersfield, California, ABC affiliate KERO.

Video: Kutana na mzee huyu anayefuga Mamba nyumbani kwake

Kutana na mzee huyu anayefuga Mamba nyumbani kwake katika mtaa wa Gatumba mjini Bujumbura Burundi.

Nini hasa kilichompelekea kuanz kufuga wanyama hawa hatari nyumbani kwake?

Video: Gari hili linaweza kutumika miaka 100 bila kuongezwa mafuta

Moja kati ya mambo ambayo mtu wa anayafikiria kabla hajanunua gari ni kiasi cha mafuta kinachotumiwa na gari hilo. Lakini ukiwa na gari hili… unaweza usifikirie kabisa kuhusu mafuta huku ukilitumia kama kawaida kwa zaidi ya miaka 100.

Wataalam wa masuala ya magari wameeleza kuwa endapo gari linalotumia ‘Thorium’ litaanza kufanya kazi litakuwa gari ambalo linaweza kutumika kwa zaidi ya miaka 100 bila kuongezwa mafuta.

Kwa maana hiyo Thorium itakuwa na uwezo wa kudumu hata zaidi ya maisha ya mtumiaji wa gari hilo.

Kampuni ya Laser Power tayari imeshatengeneza idea ya kutumia Thorium katika engine za magari  ambapo wataitumia kitaalam kuchemsha maji na kuwa chanzo cha nguvu ya kuendesha gari.

Hata hivyo, CEO wa Laser Power System, Dr. Charles Sevens aliiambia Mashable kuwa engine za Thorium hazitaweza kuwa kwenye magari hivi karibu kwa kuwa watengenezaji wa magari hawataki kuzinunua.

Cars are not our primary interest. The automakers don’t want to buy them.” Alisema Dr Charles Stevens.

Alisema makampuni mengi ya magari yanataka kutengeneza pesa zaidi kwa kutumia engines za gas na kwamba itawachukua miongo kadhaa kukubali na kuanza kutmia teknolojia ya Thorium.

Endapo gari hili litafanikiwa kuingia sokoni na kununuliwa na watu wengi miaka ijayo, itakuwa hatari kwa biashara ya mafuta hasa kwa wale wanaotegemea magari pekee kufanya mauzo.

Ebola:Shule zote zafungwa Liberia

Rais wa Liberia,Ellen Johson Sirleaf ametangaza amri ya kufungwa kwa shule zote nchini humo kama mpango wa taifa hilo wa kukabiliana na ugonjwa wa homa ya Ebola.  

Mpango huo pia unashirikisha kuzitenga baadhi ya jamii zilizokatika hatari ya kuambukizwa ugonjwa huo.

Hatua hiyo inajiri huku maafisa wa afya wakidaiwa kuzongwa na kazi katika mji mkuu wa Monrovia ambapo vyumba vya kuwatenga waathiriwa wa ugonjwa huo vimejaa. 

Katika visa vingine wagonjwa wamelazimika kutibiwa nyumbani kutokana na ukosefu wa vituo vya kutoa matibabu.

Mwandishi wa BBC aliyeko huko Thomas Fessy anasema huu ni mpango huo ambao mamlaka inaamini utapunguza mtagusano baina ya jamii na hivyo basi kusitisha kuenea zaidi kwa Ugonjwa huo unaoua. 

Shule zote nchini humo zimefungwa ,na tayari wafanyikazi wa mashirika na Wizara za Serikali zisizo na umuhimu mkubwa wamepewa likizo ya siku 30. 
Baadhi ya jamii zimetengwa-na kupewa madawa na chakula. 

Serikali inajaribu kuzuia watu kutembea kutoka eneo moja hadi jingine ikiwa na imani kwamba watu walioathirika watajulikana na kutibiwa. 
Vikosi vya usalama vimeagizwa kutekeleza hatua hiyo.

Wakati huohuo baadhi ya raia wamepinga kubuniwa kwa eneo jipya la kuwatenga watu na kuwalazimu maafisa wa afya kuwatibu hadi wagonjwa 20 katika makaazi yao. 

Bado haijulikani ni vipi serikali itafanikiwa kutekeleza hatua hiyo wakati ambapo kuna hofu na shauku. 

Hadi kufikia sasa Ugonjwa huo umewaua zaidi ya watu 672 katika matifa matatu ya Afrika Magharibi yaani Liberia Sierra Leone na Guinea huku mtu mmoja akifariki nchini Nigeria.

Shirika la Marekani linalotoa misaada ya huduma kwa jamii (Peace Corps) limewaondoa mara moja wahudumu wao katika mataifa yaliyoathirika pakubwa Liberia, Sierra Leone na Guinea baada ya mmoja wao kupatikana ameambukizwa. 

Kulingana na takwimu Ebola huua asilimia 90% ya watu walioambukizwa homa hiyo ambayo huchukua kuanzia siku 2-20 kujulikana iwapo mtu ameambukizwa. 

Hiyo ndiyo sababu asilimia kubwa ya wahudumu wa afya waliokuwa wakiwatibu wagonjwa walidhania kuwa ilikuwa ni Malaria na hivyo kuambukizwa homa hiyo kali. 

Ugonjwa huu ulitubuka nchini Guinea mwezi Februari. 

Homa hiyo ilienea kwa haraka hadi Liberia na sasa Sierra Leone.

Apoteza maisha baada ya kushiriki challenge ya Facebook kucheza na moto

Mitandao ya kijamii imekuwa sehemu ya furaha na burudani, ingawa pia ni chanzo kikubwa cha habari za aina zote. 

Lakini inaweza kuwa chanzo cha matatizo makubwa kwa wanaoitumia pia. 
Ripoti kutoka Buffalo, New York, Marekani zinaeleza kuwa kijana mwenye umri wa miaka 15 anaefahamika kwa jina la James Shores amepoteza maisha baada ya kushiriki katika challenge ya facebook ya kujiunguza na moto mwili mzima huku unajirekodi kisha unapost kipande cha video ili watu waone kwa sekunde chache utakavyofanya.   

Tahadhari ni kwamba baada ya maumivu ya sekunde chache unajipiga maji ili kujiokoa. 
Challenge hiyo maarufu imepewa hashtag  #FireChallenge katika mtandao wa kijamii wa Facebook. 

Lakini kama wahenga wanavyosema usicheze na moto, James Shores alipoteza maisha baada ya kufanya zoezi hilo na kuzidiwa na moto uliomchoma mwili mzima huku jitihada za kujiokoa zikishindikana.

Vyanzo vimeeleza kuwa hata marafiki zake waliokuwa wanamchukua kipande cha video walijaribu kupambana na moto huo lakini walishindwa kabisa kumuokoa kwa muda kwani baada ya moto huo kuzima alipoteza maisha kutokana na majeraha makubwa aliyoyapata. 

Inaelezwa kuwa wengi ambao wamekuwa wakishiriki katika shindano hilo hujiwasha moto wakiwa karibu na bafu kwa sekunde chache na kisha kujirusha ndani ya maji. 

Kamishina wa Polisi wa Buffalo, James Daniel aliongea na News-Two na kuthibitisha kutokea kwa tukio hilo huku akiwaonya watu kuacha kushare video za namna hiyo kwani zinaweza kuwa tatizo kubwa hasa kwa watoto. 

Facebook pia wameamua kuzifuta video za aina hiyo #FireChallenge kutoka kwenye website yao.

Abiria wote na wahudumu wa ndege ya Air Algerie AH5017 waliangamia jangwani

Abiria wote na wahudumu wa ndege ya Air Algerie AH5017 waliangamia jangwani. 
Rais wa Ufaransa Francois Hollande ametangaza kuwa majeshi ya ufaransa yamefaulu kupata mabaki ya ndege lakini hawakuweza kuokoa nafsi hata moja. 

Aidha rais Francois Hollande ametangaza kuwa majeshi hao wamepata mtambo wa kunukuu sauti ''Blackbox'' huko Mali ilikoanguka ndege hiyo iliyokuwa ikielekea mji mkuu wa Algeria Algiers. 

Ndege hiyo ilikuwa imetoka mji mkuu wa Burkina Faso Ouagadougou ikiwa na Abiria 110 na wahudumu 6 . 
Abiria 50 waliokuwa ndani ya ndege hii walikuwa ni raiya wa Ufaransa.

Mchepuko! Achezea kichapo kwa kuchepuka na mke wa mjomba wake

TIMBWILI la aina yake lilifumuka ndani ya gesti moja iliyopo Mbezi Afrikana jijini Dar es Salaam (jina kapuni), kufuatia kijana aliyefahamika kwa jina moja la Kelvin kumkuta chumbani mtu aliyedai ni mjomba wake, Joseph akiwa na mkewe wa ndoa, Emiliani.

Mjomba wa Kelvin(Joseph) akimsihi Mpwa wake amsamehe mara baada ya kukutwa gesti na mke wa Kelvin.

Mkasa huo wa ajabu ulijiri usiku wa Jumamosi iliyopita kwenye gesti hiyo iliyopo Mbezi ya Afrikana jijini Dar es Salaam. 
Mama mmoja aliyedai ni mpishi wa futari maeneo hayo, alipiga simu kwa makamanda wa Oparesheni Fichua Maovu (OFM) na kusema:

“Mimi ni mpishi wa futari hapa Mbezi Afrikana kuna baba mmoja na ndugu zake wanachakazana, kisa wamefumaniana kwenye gesti ya (akaitaja jina). Ipo hapahapa jirani njooni muwahi.”

Kufuatia taarifa hiyo, mkuu wa zamu wa OFM aliwaagiza mapaparazi wake wanaotumia pikipiki ziendazo kasi ambao walitumia muda usiozidi robo saa kutoka walipokuwa kufika eneo la tukio ambapo walimkuta Kelvin amemvaa mjomba ‘ake chumbani ambapo timbwili zito lilitifuka. Walikuwa wakigaragazana huku mjomba mtu huyo akiwa kama alivyozaliwa na damu chapachapa jambo lililomtia aibu!

Mapaparazi wetu bila kuzubaa nao walianza kuchukua picha za tukio  hatua kwa hatua. Wakati Timbwili likiendelea, Joseph alikuwa akipiga mayowe kumuomba mpwa wake huyo amsamehe ili wayamalize kimyakimya na kumsihi asisambaze habari hizo zikafika mpaka nyumbani kwa mke wake. 
Katika hali ya kushangza, wakati wawili hao wakiendelea kuangushana chumbani, mke huyo alipata upenyo na kuchoropoka, akatimua mbio kwa kuhofia kipigo na kukwepa kamera za OFM.

Timbwili la wajomba hao lilitulizwa na mlinzi wa gesti hiyo (jina halikujulikana)  ambaye alitumia mabavu na kufanikiwa kuwadhibiti na kuwaweka kitako.

Baada ya kutulizwa, Kelvin aling’ang’ania waende polisi lakini mjomba mtu alikataa katakata akimbembeleza mpwa wake kwamba wayamalize na kuahidi kutorudia tena mchezo huo huku akisema mwanamke huyo alimuwekea mtego wa makusudi.

Baadhi ya waungwana waliofika kushuhudia tukio hilo walimsihi Kelvin kumsikiliza mjomba ‘ake na kupokea fidia kidogo kwani kuyasongesha mbele mambo hayo ni aibu kwa familia yao na kumtia matatani mjomba huyo kwa mkewe. 

Kufuatia maombi ya watu, akiwemo mlinzi wa gesti hiyo, Kelvin alikubali kumsamehe mjomba wake ambaye naye ‘alijikomiti’ kimaandishi (kopi tunayo) kumlipa Kelvin fidia ya shilingi laki tano (500,000) na kuahidi kutorudia kummendea mke wake.

Katika barua hiyo aliyoaindika Joseph kwa mkono, alikiri kukutwa na mke wa Kelvin na kusema anatoa shilingi laki tatu (300,000) siku hiyo kisha kiasi kinachobaki atatoa siku inayofuata.

Hata hivyo, taarifa zilizotufikia wakati tunakwenda mitamboni zinadai kuwa, Joseph alikwenda kituo cha polisi (jina halijajulikana) kumfungulia kesi mpwa wake Kelvin na mkewe Emiliani akidai walipanga kumfanyia fumanizi. 

Credit GPL.

SAKATA LA VIUNGO: Serikali yaingilia kati

Serikali kupitia Wizara ya Afya na Ustawi wa Jamii imeingilia kati sakata la utupwaji wa viungo vya binadamu katika eneo la Mto Mpiji kwa kuunda kamati ya watu 15 kufanya uchunguzi na kumaliza kazi hiyo ndani ya siku saba. 

Makamu Mkuu wa Chuo cha International Medical and Technological University (IMTU), Profesa PV Prabhak Rao (mwenye koti la blue)  na viongozi wengine wakisindikizwa na polisi kuingia kwenye Kituo cha Oysterbay, Dar es Salaam jana, kwa ajili ya mahojiano kuhusiana na upatikanaji wa viungo vya binadamu eneo la Mpigi Bunju


Sambamba na hatua hiyo, Jeshi la Polisi limesema halitawaachia watuhumiwa wanane linaowashikilia hadi ukweli utakapojulikana. 

Kamati hiyo imeundwa kuchunguza jinsi viungo hivyo vilivyotupwa, sheria zilizovunjwa na kupendekeza hatua zinazoweza kuchukuliwa dhidi ya wahusika wakiwamo viongozi wa Chuo Kikuu cha Kimataifa cha Tiba na Teknolojia (IMTU), ambao wamekiri kuwa viungo vilivyotupwa mara ya mwisho vilitoka  katika taasisi yao.

Naibu Waziri wa Afya na Ustawi wa Jamii, Dk Stephen Kebwe alisema jana kuwa  kamati hiyo iliyoanza kazi juzi, inawashirikisha wadau muhimu kutoka Ofisi ya Mwanasheria Mkuu wa Serikali, Wizara ya Afya, Wizara ya Mambo ya Ndani, Tume ya Vyuo Vikuu (TCU), Hospitali ya Taifa Muhimbili na Wizara ya Elimu na Mafunzo ya Ufundi. 

“Kwa sasa tunaendelea na kazi za kawaida kuratibu na kuhakikisha shughuli za kamati zinaendelea. Baada ya kamati kukamilisha kazi yake ndipo tutakapojua hatua za kuchukua na wanaostahili kuchukuliwa hatua,” alisema. 

Kamati hiyo imeundwa wakati Polisi Kanda Maalumu ya Dar es Salaam ilishatangaza kuunda jopo lake la uchunguzi, lakini alipoulizwa jana, Kamanda wa Kanda hiyo, Suleiman Kova alisema kamati aliyounda ni sehemu ya hiyo iliyoundwa na wizara.

Awali, Kamanda wa Polisi Mkoa wa Kinondoni, Camilius Wambura alisema kwa sasa hatarajii kama watuhumiwa hao wataachiwa hadi upelelezi na mahojiano yanayofanywa yatakapokamilika. 

Kamanda Wambura alisema jalada linalowahusu watuhumiwa waliokamatwa Jumanne wiki hii, ambao ni viongozi wanane wa IMTU limehamishiwa kwa Mkuu wa Upelelezi wa Kanda Maalumu ya Dar es Salaam kwa ajili ya uchunguzi zaidi.

Sakata lilivyoanza  

Taarifa za kuonekana kwa viungo vya miili ya binadamu ikiwa imefungwa katika mifuko myeusi zilizagaa Dar es Salaam Jumatatu jioni huku wengi wakidai kwamba huenda kuna mauaji ya halaiki yaliyofanyika sehemu isiyojulikana. 

Baadaye Jumanne ilibainika kwamba viungo hivyo vya miili ya binadamu vilitupwa kimakosa na havihusiani na mauaji yoyote ya kukusudiwa, bali vilikuwa vikitumiwa na wanafunzi wa udaktari katika chuo cha IMTU kwa ajili ya mazoezi. Hata hivyo, viungo hivyo vilitupwa katika eneo hilo kinyume na taratibu zinavyoelekeza, hivyo viongozi wa chuo hicho kukamatwa na polisi. 
Chama cha Madaktari Tanzania (MAT), juzi kilitoa taarifa kuhusiana na suala hilo kikiziomba mamlaka zinazohusika kuhakikisha wahusika wote wanachukuliwa hatua.

Credit Mwananchi.

Watishia kufunga viwanda vya bia na vya pombe kali

Watengenezaji wa bia na vinywaji vikali, wametishia kufunga baadhi ya viwanda iwapo Serikali haitaipunguza ongezeko la kodi la asilimia 20 iliyolipishwa kinyume na tozo ya asilimia 10 iliyopitishwa na Bunge. 

Uamuzi huo umekuja baada ya wenye viwanda vya vinywaji hivyo kubaini kuwa Muswada wa Sheria ya Fedha wa mwaka 2014/15 uliotolewa Julai 11, mwaka huu, unataja kuwa kodi kwa bidhaa hizo itakuwa asilimia 20. 

Akizungumza jana, mwakilishi wa wenye viwanda nchini, David Mgwassa alisema uamuzi wa kupandisha kodi kinyemela umewaacha njiapanda wenye viwanda kwa kuwa hawajui walipe kodi ipi kati ya asilimia 10 au 20 na kwamba, iwapo Serikali haitapunguza, watafunga baadhi ya viwanda ili kumudu ongezeko hilo jipya la kodi.

“Kila kampuni inafanya utafiti ili kufunga viwanda vyote na kubaki na kimoja kikubwa kitakachopunguza gharama. Pia ikumbukwe kuwa kuna viwanda vilijengwa kwa lengo la kuja kubinafsishwa, hivyo wengi watakosa ajira. Wawekezaji wana wasiwasi kama Tanzania ni sehemu nzuri kuwekeza tena. 

“Kodi ya mwaka 2014 ni ipi? Viwanda vilipanga bei kulingana na asilimia 10, lakini Muswada wa Sheria ya Fedha unasema kodi hiyo imeanza rasmi kutoka Julai 1, mwaka huu, tutafilisi viwanda,” alisema Mgwassa. 

Pia alihoji: “Kwa nini Bunge lijadili na kupitisha kodi asilimia 10 halafu muswada useme asilimia 20. Ni nani anayemtania mwenzake?” 

Alisema iwapo mahitaji ya bidhaa hizo yatapungua nchini, kampuni zinazomiliki viwanda vya vinywaji zitalazimika kupunguza uzalishaji. 

Alisema viwanda vya bia na vinywaji vikali vinapambana na ushindani mkali kutoka bidhaa za nje zinazoingia nchini kinyume cha sheria, jambo linaloweza kuufanya uchumi ukashuka iwapo hali hiyo haitadhibitiwa.

Credit Mwananchi.

Ndege ya Algeria yatoweka na watu 116

Shirika la ndege la Algeria , Air Algerie, limesema kuwa limepoteza mawasiliano na moja ya ndege zake ilipokuwa ikitoka mji mkuu wa Burkina Faso Ouagadougou. 

Afisa huyo anasema kuwa ndege hiyoya Air Algerie ilikuwa imepaa dakika 50 katika anga ya Sahara mara ya mwisho mawasiliano yao. 
Ndege hiyo iliokuwa inaeelekea mji mkuu wa Algiers, ilikuwa na watu mia na kumi na wahudumu sita . 
Oparesheni ya dharura ya kuitafuta ndege hiyo ieanzishwa, 
Ndege hiyo nambari AH 5017 inamilikiwa na shirika la ndege la kihispania la Swiftair.

Mwandishi wa BBC Alex Duval Smith aliyeko katika mji mkuu wa Mali Bamako anasema kuwa kuna habari kuwa ndege hiyo huenda ilianguka katika eneo la janga la sahara kati ya  mji wa Gao and Tessalit . 

Mwandishi huyo wa BBC ananukuu ripoti kutoka kwa wanajeshi wa kulinda amani walioko huko Mali na duru za shirika la habari la AFP. 
Brigadia mkuu wa majeshi ya kulinda amani nchini Mali Koko Essien, amesema kuwa maeneo hayo ya jangwani yana idadi ndogo sana ya wakaazi kwa hivyo ni vigumu kupata habari kutoka huko na inawabidi kutafuta ilikoanguka ndege hiyo.

Aidha Brig Essien anasema kuwa eneo hilo linamilikiwa na wapiganaji waasi . 
Wamiliki wa ndege hiyo Swiftair wamesema kuwa ndege hiyo aina ya MD83 ilikuwa imeomba kubadili uelekeo wake kutokana na hali mbaya ya anga na ukungu mkubwa karibu na mpaka wa Algiers. 
Ndege namba AH 5017 husafiri kupitia njia ya Ouagadougou-Algiers mara nne kwa wiki,AFP imeripoti. 

Raia wa Algeria ni miongoni mwa abiria waliokuwa ndani ya Ndege hiyo,Gazeti moja la Algeria limeripoti.  Mwezi Februari ndege ya kijeshi ya Algeria ilianguka na kuuwa watu 77 waliokuwemo. 
Tukio hili la hivi punde Linaloongeza wasiwasi kuwa njia inayotumiwa na misafara ya ndege ziendazo sehemu hiyo inapitia eneo lenye utata la anga ya Mali.

Israeli yaishumbulia Shule ya UN Gaza

Takriban watu 15 wameuawa na wengine 200 kujeruhiwa vibaya baada ya majeshi ya Israeli kulipua shule inayoendeshwa na Umoja wa Mataifa kuwahifadhi wakimbizi wa ndani kwa ndani wanaotoroka mashambulizi ya Isareli katika ukanda wa Gaza . 

Wizara ya Afya katika ukanda wa Gaza imedhibitisha shambulizi hilo katika shule hiyo iliyoko Beit Hanoun ambayo inatumiwa kama makazi ya wakambizi wapalestina wanaotoroka makombora ya Israili. 

Shambulizi hilo ni la nne kutokea katika vituo vinavyomilikiwa na Umoja wa Mataifa tangu Israeli ivamie ukanda huo yapata majuma mawili yaliyopita. 
Kufikia sasa Wapalestina 725 wameuawa .

Waisraeli 30 wameuawa wengi wao wakiwa ni wanajeshi katika siku 16 za makabiliano kati ya Israeli na Hamas. 

Israeli iliishambulia Gaza Julai tarehe 8 ikitafuta mbinu za kuzima mashambulizi ya makombora ya Hamas yanayotokea Gaza. 

Awali mwsimamizi wa Shirika la Umoja wa Mataifa linalosimamia maswala ya Misaada bi Valerie Amos alisema kuwa hali ya maisha imeendelea kuzorota katika ukanda huo na kuwa kuna haja ya dharura ya kusitishwa kwa vita ilikufanikisha utoaji wa misaada ya kibinadamu .
Bi Amos alisema kuwa watu laki moja (118,000) wanaishi katika kambi za umoja wa mataifa zilizoanzishwa katika shule zinazoendeshwa na UN.

Mkuu huyo wa UN alisema kuwa maji yamepungua na chakula pia hakitoshi kuwalisha wakimbizi hao wote . 
Bi Amos amesema kuwa asilimia 44% ya Gaza hapakaliki kwa Wapalestina. 

Hayo yamejiri baada ya Waziri mkuu wa Israeli Benjamin Netanyahu amesema kuwa anasikitikia vifo vya Wapalestina lakini wajibu unamtegemea kiongozi wa Hamas ambaye bado anashikilia kuwa Israeli hainabudi kukoma kuikalia Gaza kimabavu.

Na BBC

Maajabu:Kijana mwenye umri wa miaka 17 ang'olewa meno 232, tizama video hapa

Madaktari nchini India wametumia saa 7 kufanikisha upasuaji wa kinywa cha kijana Ashik Gavai mwenye umri wa miaka 17 aliyekuwa akipata maumivu ndani ya kinywani .

Dr Sunanda Dhiware, mkuu wa Kitengo cha tiba ya meno katika hospitali ya JJ mjini Mumbai ameiambia BBC kuwa wamefanikiwa kuyang’oa meno 232 kinywani mwa Ashik aliyeletwa hospitalini hapo akiwa amevimba taya huku akilalamika kwa maumivu makali.

Madaktari wamesema wamelazimika kutumia nyundo na tindo kuyatoa meno hayo na wakadai kwamba hilo ni tukio la ajabu na linaingia katika rekodi ya dunia.Hata hivyo Upasuaji huo umehusisha jopo la madaktari wanne.

Dr Dhiware anasema katika uzoefu wake wa miaka 30 ya udaktari wa kinywa na meno hajawahi kukutana na tukio la namna hiyo. Ameongeza pia kuwa kulingana na vitabu vilivyopo vinasema hali kama hiyo inaweza kujitokeza katika taya la juu na meno yaliyowahi kung'olewa katika hali hiyo yalikuwa 37 lakini cha kushangaza ni kuwa tukio la Ashik Gavai limetokea katika taya ya chini na ameng'olewa meno 232 idadi ambayo ni kubwa huku akisalia na 28 kwa matumizi yake ya kawaida wakati kitaalamu mtu mzima anapaswa kuwa na meno 32.
Baba mzazi wa kijana Ashik ,Suresh Gavai amenukuliwa akisema mtoto wake alikuwa akilalamika kwa miezi kadhaa juu ya maumivu na kwamba walidhani inaweza kuwa ni matatizo ya saratani na ndipo wakamleta Mumbai.